Игорь Криушенко "Шўртан" клубини қабул қилиб олганини Беларусда бироз кутилмаган ҳол сифатида қабул қилишди. Ушбу мураббий ўзининг қарорини Гоалс.бй сайтига берган интервьюсида тушунтириб беришга ҳаракат қилди.

- Сиз ўтган ҳафтанинг асосий муҳокамасида бўлиб турдингиз. "Шўртан" билан шартнома имзолашингиз қандай амалга ошди?
- Клуб раҳбарияти менга таклиф билан чиқди. Клуб қароргоҳига етиб бориш, инфратузилмани кўздан кечириш, раҳбарият билан суҳбатлашиш ва шундан кейин аниқ қарорга келишим ҳақида келишиб олгандик.

- Сизда бош қа таклифлар ҳам бор эдими?
- Мен шартнома имзолаб бўлдим ва бошқа таклифлар ҳақида гапиришни ёқтирмайман. Бу ҳақда гапиришдан маъно йўқ.

- Норасмий маълумотларга қараганда, сиз терма жамоа бош мураббийлигига асосий номзод эдингиз. Шунингдек, Минскнинг "Динамо" клуби бошқарувига номзод мураббийлар сафида тилга олингандингиз.
- Такрорай айтаман. Мен буни изоҳламоқчи эмасман. "Шўртан" билан шартнома имзоладим ва бу шартнома муддатини виждонан ўтамоқчиман.

- "Шўртан" эса сизнинг олдингизга жиддий ма қсад қўймоқда: кучли учликка кириш.
- Аниқ мақсадларни ёқтирмайман. Мен жамоа олдига шундай мақсад қўяман: ҳар бир баҳсда муносиб ўйин ва максимал натижага эришиш. Глобал мақсад ҳақида эса чемпионат якунида гапиришимиз мумкин.

- Клуб инфратузилмасини қандай баҳолайсиз? База ва стадион суратларда анча чиройли кўринмоқда.
- Ишлаш учун барча шароитлар муҳайё қилинган: база, майдонлар, илмий ва тиббий таъминот. Яхши маънода ҳайрон қолдим. Шунингдек, клуб раҳбарияти билан танишиш ва суҳбатлашиш мароқли бўлди. Клуб тепасида ўз олдига жиддий мақсадларни қўйган раҳбарлар ўтирибди. Улар ҳақиқатан ҳам минтақада футболни ривожлантиришни исташади. Қарор қабул қилишимда булар муҳим роль ўйнади.

- "Шўртан" қандай майдонларда ўйнайди?
- Ҳам табиий, ҳам сунъий қопламали майдонлар бор. Чемпионат ўйинларини жамоа табиий майдонда ўтказади. Айтишларича, бу майдон мамлакатдаги энг яхшиларидан бири экан.

- Ўзбекистон чемпионати ҳақида қандай тасаввурга эгасиз?
- Тасаввурларим ҳозирча умумий характерга эга. Мен "Шўртан" иштирокидаги ўйинларнинг дисскларини олиб келдим. 14 декабрга қадар уларни кўриб чиқиб, жамоанинг қандай ҳаракат қилиши, рақибларнинг қандай кучга эгалиги ҳақида тасаввурга эга бўламан. Ўйинчиларни, қайси чизиқлар кучайтиришга муҳтожлигини яхши билиб олишим керак. Ҳозирча менинг асосий вазифам шундан иборат.

- "Шўртан"да асосан ма ҳаллий футболчилар тўп сурадими?
- Регламентга кўра, майдонда 4тадан ортиқ легионер бўлиши мумкин эмас. Шунинг учун асосан ўзбекистонлик футболчилар ҳаракат қилишади.

- Николай Риндюк Ўзбекистоннинг "Машъал" ва "Динамо" клубларида ўйнаган. Шартнома имзолашдан аввал у билан су ҳбатлашдингизми?
- Коля билан ҳали гаплашмадим. У билан энди гаплашсам керак.

- "Шўртан"да беларуслик футболчилар пайдо бўлиши мумкинлиги ҳақида гапиргандингиз...
- Мен жамоа футболчилари ва чемпионат ҳақида аниқ тасаввурга эга бўлиб олганимдан кейингина бу ҳақда гапиришим мумкин. Легионер асосий таркиб ўйинчиси бўлишни истаса, ҳар доим маҳаллий футболчидан устун бўлиши керак. Захирада ўтирадиган легионер эса бизга керакас. Бу нотўғри бўлади.

- Ўзбек клубига бош мураббий этиб тайинланганингиз ҳақидаги хабарга муносабат билдирган кўпчилик, бунга ҳайрон бўлишди. Баъзилар буни ортга ташланган қадам сифатида баҳолаган бўлса, баъзилар пул ишлаш учун қабул қилинган қарор деб ўйлашмоқда...
- Халқнинг гапириши - бу нормал ҳолат. Ҳар кимнинг ўз фикри бор. Мураббий ҳар доим ишлаши ва амалиётга эга бўлиши керак деб ҳисоблайман. Яна бир марта такрорлайман: раҳбариятнинг амбицияси ва ишлаш учун яратилган шароитлар қарор қабул қилишимда муҳим роль ўйнади. Ҳа, олис ўлка. Тўғри, иссиқ. Аммо юқори мақсад ва ривожланиш учун кучли иштиёқ бўлса, барчасига чидаса бўлади. Мураббийлик ишида бу энг асосий омил. Одамлар нимани хоҳласа, шуни гапираверишсин. Бу борада мен шахсий фикримга эгаман. Қарорим тўғри ёки нотўғрилигини эса вақт кўрсатади. Буниси ёлғиз Худога аён.

Давоми бор...