O‘zbekiston aloqa va axborotlashtirish agentligining Maxsus avariya-tiklash boshqarmasi (15361-harbiy qism)da harbiy qism tashkil etilganligining 51 yilligi va O‘zbekiston Respublikasi Konstitusiyasi qabul qilinganligining 19 yilligi munosabati bilan tantanali marosim o‘tkazildi.

Tadbir munosabati bilan boshqarmaga Toshkent axborot texnologiyalari universitetining Maxsus fakulteti kursantlari, axborot texnologiyalari fakultetining 2-bosqich 230-guruh talabalari hamda poytaxtning Yakkasaroy tumanidagi 48-harbiy sport sinfi tarbiyalanuvchilari taklif etildi. Ular harbiy qismda ofitser va askarlar uchun yaratilgan sharoitlar, avariya-tiklash vaziyatlarida qo‘llaniladigan transport va aloqa vositalari bilan yaqindan tanishtirildi, o‘zlarini qiziqtirgan savollarga javob olishdi.

Majlislar zalida o‘tgan marosimda so‘z mamlakatimiz Konstitusiyasi, harbiy qismning yarim asrdan ziyodroq tarixi va buguni, xalqimiz tinchligi, mamlakatimiz hududiy yaxlitligi va daxlsizligini ta'minlash, mustaqilligimizni ko‘z qorachig‘idek asrab-avaylash haqida bordi. Boshqarma boshlig‘i, polkovnik Yu.Sobirov yig‘ilganlarni shonli sanalar bilan qutladi. Shundan so‘ng boshqarma tarbiyaviy ishlar bo‘limi boshlig‘i Sh.Qurayshev, 48-harbiy sport sinfi rahbari o‘.Nuriyev, qator kursant va askarlar so‘zga chiqishdi.

Bayram munosabati bilan bir qator harbiylarga navbatdagi harbiy unvonlar taqdim etildi, namunali xizmatlari uchun esa askarlarga faxriy yorliqlar, tadbir mehmonlariga esdalik sovg‘alari topshirildi.